Ջգրաշեն եկեղեցի

Պատմություն և տեղադրություն

Ջգրաշեն եկեղեցին կառուցվել է 1195 թվականին հայազգի Սալավմայի կողմից այդտեղ գտնվող քանդված եկեղեցու տեղում: Այս մասին հայերեն արձանագրություններ կան եկեղեցու պատերին: Ի սկզբանե, այն կոչվել է Սուրբ Աստվածածին եկեղեցի:

Հաղպատ գյուղի թաքնված այս հուշարձանը գտնվում է Հաղպատի վանքի պարսպից ընդամենը 20 մետր հեռու: Քանի որ այցելուների մեծ մասը վանական համալիր են մտնում առանց փոքր եկեղեցուն ուշադրություն դարձնելու, այն հաճախ մնում է աննկատ:

Ճարտարապետական նկարագիր

Ջգրաշեն եկեղեցին կառուցված է սրբատաշ բազալտից և իր ճարտարապետական տեսքով կարծես հանգստություն պարգևի այցելուներին: Այն ունի ուղղանկյուն հատակագիծ և երկթեք տանիք: Մուտքն արևմտյան կողմից է, որի շրջանակը եզերված է զարդաքանդակներով: Դռան վերևի կիսակլոր քարին փորագրված են փոքր խաչքարեր, աղավնակերպ թռչուններ և վարդանման ծաղիկներ: Նմանատիպ քանդակներ կան պատերին, որոնց մեջ ագուցված Է 2 խաչքար: Դրանք ունեն բուսական պատկերներ և պատրաստված են չափազանց նուրբ ձևով: Արևմտյան և արևելյան կողմերում առկա են մեկական երկար ու նեղ լուսամուտներ, որոնց վերևի մասը կամարակապ է:

Շրջակայքը

Ջգրաշեն եկեղեցու դիմաց փոքրիկ գերեզմանոց է, որտեղ կան 12 տապանաքարեր: Դրանցից մեկի վրա հայերենով գրված է Դավիթ, իսկ մյուսի վրա՝ Հասան: Այս փոքր գերեզմանոցն, ըստ էության, հանդիսանում է եկեղեցու հիմնադրի տոհմական գերեզմանատունը: Ներկայում հողի շերտի պատճառով տապանաքարերը չեն երևում:

Եկեղեցու մոտից հրաշալի տեսարան է բացվում դեպի Հաղպատի վանական համալիրի պարսպի մեծ դիտաշտարակ և Սուրբ Նշան եկեղեցի:

Ինչպե՞ս այցելել

Ջգրաշեն եկեղեցին տեսնելու համար անհրաժեշտ է գնալ Հաղպատի վանքի մուտքի մոտ: Աստիճաններին չհասած՝ աջ կողմում, առկա է երկաթյա անշուք դռնակ: Ներս մտնելով՝ կտեսնեք այս փոքրիկ, բայց պատմական հուշարձանը: Գարնան, ամռան և աշնան ամիսներին տարածքում տեղադրված շարժական վաճառասեղանների պատճառով հնարավոր է դռնակը չերևա: Շրջանցեք դրանք և ներս մտեք: Մուտքն ազատ է 24 ժամ: