Հաղպատի վանքի աղբյուր

Հաղպատ գյուղում է գտնվում Հայկական լեռնաշխարհի ամենանշանավոր աղբյուրներից մեկը և հայտնի է որպես Հաղպատի վանքի աղբյուր: Կառուցվել է 1258 թվականին Հաղպատի վանքի առաջնորդ Հովհաննեսի նախաձեռնությամբ: Սառնորակ ջուրը Սուրբ Լույս լեռան լանջերից այստեղ է հոսում կավե խողովակների միջոցով և արդեն 800 տարի հագեցնում է այցելուների ծարավը:

Տարբեր դարերում աղբյուրից ջուր են խմել հայոց թագավորներ ու թագուհիներ, իշխաններ ու իշխանուհիներ, գիտնականներ և կրոնական գործիչներ, տեղի բնակիչներ և ճանապարհորդներ:

Ճարտարապետական նկարագիր

Ճարտարապետական լուծումներով համահունչ է Հաղպատի վանքին: Կառուցվել է կապտավուն բազալտե սրբատաշ քարերից: Ուղղանկյուն սրահի ճակատային մասը եռակամար է, որոնցից կենտրոնականն ավելի բարձր է և ունի կառուցման ու վերանորոգման մասին հայերեն արձանագրություն: Ջուրը հոսում է երկու ծորակով և թափվում ջրավազանի մեջ:

Ջրահավաք կառույցներ

Հաղպատի վանքի աղբյուրի շենքից շուրջ 1 կմ հեռու՝ Սուրբ Լույս լեռան լանջին, անտառի մեջ, գտնվում է աղբյուրի ջրահավաք ավազանը: Վերակառուցվել է 1827 թվականին Անտոն արքեպիսկոպոսի կողմից, ով Հաղպատ էր այցելել Հայ առաքելական եկեղեցու Եփրեմ Ա Երևանցի ամենայն հայոց կաթողիկոսի հետ: Այդ մասին վկայող հայերեն արձանագրությունը առկա է կառույցի վրա:

Հարևանությամբ գտնվող հուշարձաններ

Հաղպատի վանքի աղբյուրը գտնվում է Հաղպատի վանքի և Կուսանանց անապատ եկեղեցու միջև՝ միմյանցից ոչ շատ հեռու: Աղբյուրի շենքի անմիջապես հարևանությամբ տարածված է միջնադարյան գերեզմանոցը, որը հարուստ է խաչքարերով և յուրահատուկ տապանաքարերով:

Ինչպե՞ս այցելել

Այստեղ կարելի է հասնել Մեծ աղբյուրի արահետով, որը սկսվում է Հաղպատի վանքից և ավարտվում Կուսանաց անապատ եկեղեցու մոտ:

Բաց մի թող պատմական հնարավորությունը, այցելիր այստեղ և վայելելիր սրբազան ջրի սառնությունը: Մուտքն ազատ է 24 ժամ: