Աչեր գետ

Աչեր գետը Հաղպատի ձորի և ընդհանրապես Լոռու մարզի բնական հուշարձաններից է: Հենց այս գետն է ստեղծել դեպի Հաղպատ գյուղ տանող ճանապարհի գեղեցկությունը և գրավչությունը: Կարևոր դեր է կատարում Լոռու մարզի էկոհամակարգում: Գետը հայտնի է նաև Ժիվանք, Շերեք և Հաղպատ անուններով, որոնք սակայն վերաբերում են միայն Հաղպատ գյուղի հատվածին:

Ակունք և ավազան

Աչեր գետը սկիզբ է առնում Գուգարքի լեռների Հալվաներսար լեռան լանջերից: Ունի 15 կիլոմետր երկարություն: Սուրբ Լույս լեռան արևելյան ստորոտով և Հաղպատի ձորով՝ աջից թափվում է Դեբեդ գետը: Աչերը լեռնային արագահոս գետ է: Ավազանը գրեթե ամբողջությամբ պատված է անտառներով:  Անցնում է ժայռոտ տեղանքներով, անտառապատ ձորակներով՝ հաճախ առաջացնելով փոքր ջրվեժներ:

Գարնանը գետը ջրառատ է և նույնիսկ քշում տանում է հսկա քարեր: Ամռանը, երբ տեղումները դադարում են, այն առավելապես հանդարտ ու սակավաջուր է:

Աչեր գետի ավազանում՝ Հաղպատ գյուղից ոչ հեռու, աճում Հայաստանի կարմիր գրքում գրանցված հատապտղային կենի ծառատեսակը: Գետի երկայնքով կարելի է հանդիպել կաղնի, սոսի, բոխի, թխկի, թեղի և այլ ծառատեսակներ:

 

 

Պատմամշակութային հուշարձաններ

Գետի երկայնքով կան պատմամշակութային բազմաթիվ կոթողներ: Հաղպատի ձորում՝ գետի վրա է գտնվում 13-րդ դարում կառուցված Ջրաղացաձորի կամուրջը: Վերջինի մոտ ժամանակին գործել է Հաղպատի վանքի պատմական ջրաղացները: Հարակից ուղղաձիգ ժայռի մեջ Լաստի այր քարայրային համալիրն է: Գետի ձախ կողմի բարձրադիր հրվանդանի վրա գտնվում է Կայանբերդ ամրոցը, իսկ աջ կողմում Զարնի և Պարնի քարայրները:

Ինչպե՞ս այցելել

Գետը տեսնելու համար կարող եք օգտվել Կայանբերդի արահետից, որը սկսվում է Ջրաղացաձորի կամրջից և շարունակվում դեպի Կայանբերդ ամրոց: Եթե նախընտրում եք առավել երկար քայլարշավ, ապա կարող եք օգտվել Հաղպատ-Ծաղկաշատ արահետից, որի վերջին մասը ամբողջությամբ անցնում է Աչեր գետի երկայնքով՝ շուրջ 3 կմ:

Զգուշացում

Գետի ափերին հանգստանալիս խստորեն հետևեք հրդեհային անվտանգության կանոններին. շուրջը անտառներ են:

Խորհուրդ չի տրվում գետում լողալ, հատկապես ժայռոտ հատվածներում, քանի որ խոնավ քարերին կարող եք սայթաքել: